我的Dream Toy ：3D Printer之新手上路

文/绝对好奇
1.前言

小弟写呢篇文嘅目的系想将呢度咁多个post整合埋一齐,
令到一啲对3D Printer有兴趣嘅师兄更加容易明白.
我曾经都系一个无机嘅新手,所以由我以自身嘅角度去讲,
应该可以更加容易了解明白!
-----------------------------------------------------------------
如果你个心重系十五十六唔知买咗机有事要维修唔知搅唔搅得掂,
可以直接跳去<简单硬件维修篇>,睇下觉得难唔难评估下自己嘅能力先.

如果你己经下定决心要买机可以直接跳去<新手预备篇>.

如果你己经有机但唔系好知点操作部机可以直接跳去<硬件与软件篇>

如果你己经有机但唔识tune机可以直接跳去<新手tune机篇>.
-----------------------------------------------------------------

如果各位睇哂呢度咁多个post,仍然觉得有少少瞎子摸象,
搅唔清楚3D Printer呢旧嘢究竟系乜嘢嚟,咁!我希望你睇完呢篇文之后,
会更加清楚明白,而因為3D Printer都有好多类型,本文只针对现时最流行嘅普通家用机而写,
又因小弟自己都系新手,所以如果小弟有乜错漏,希望其他师兄出手指正,

3D Printer呢旧嘢究竟系乜嘢嚟?其实佢嘅运作原理同普通Printer大致相同,
普通Printer你比个文字档案佢,佢就会印出一篇文章出嚟.
3D Printer你比个3d档案佢,佢就会印出一个模型实物出嚟.
其实就系咁简单,但佢地系有分别嘅,分别如下:

a.速度
   系列印速度方面3D Printer系慢普通Printer好多嘅,
   越要求个成品模型越精细尺寸越準确速度就越慢.
b.维修保养
   由於家用机嘅3D Printer技术重未咁成熟,而又未有大公司出品零售,
   系维修保养会要求个人有一定嘅DIY能力,更换零件同一般保养,
   无普通Printer咁简单方便,你现时甚至系香港买唔倒零件或胶料呢啲消耗品,
   需要系国内或外国订购.
c.网上购物经验
   由於好多零件同消耗品要系国内或外国订购,咁意味住你需要有网上购物经验,
   你至少要有信用卡或淘X户口,如果你两样都无就要好似我咁,走去试下开番个啦!
   其实都好简单唔难!
d.空间摆放
    以我部机為例，一部可印225mm(长)x145mm(阔)x150mm(高)模型嘅3D Printer,
    佢本身部机就有18吋(长)x15吋半(阔)x22吋(高),其中15吋半(阔)系包括机背嘅胶丝卷轮,
    22吋(高)系包括电线同送丝胶喉嘅高度,比起普通Printer佔嘅空间為多.
e.噪音
    系噪音方面,新一代嘅3D Printer己经做到比较寧静只系比普通Printer稍為大声一啲.
f.气味
   系印ABS胶时会有少少胶味,同如果行得太近同长时间睇佢印嘢,会有少少(姆)眼,
   所以一定要注意空气流通.
g.3D划图
     使用3D Printer系需要一定嘅3D划图能力,除非你只下载网上嘅模型嚟印,
     如果想印自己嘅创作,就一定要有划图能力,如果你未试过3D划图,
     可以睇下呢个Offer师兄太座嘅考试图,

   

    再睇下gorto师兄嘅影片教学睇下自己学唔学倒,
     youtube.com/watch?v=QSajmUWXFZ8

呢啲嘢就要靠自己了,不过都唔算好难,只要一步一步跟住做,
     睇多几次个影片教学,我都系咁样第一次就学识咗,而且youtube都有好多教学,
     一般嚟讲应该好快学识!
h.打印成本
    3D Printer嘅打印成本比起普通Printer系平好多嘅,一卷1kg嘅ABS胶丝系120蚊人仔,
    有啲店舖重会平啲,但真系有排印,而且唔会好似普通Printer嘅墨盒放得耐会乾哂,
    或者有塞头现象.

小弟曾经都同其他师兄一样,好想拥有一部3D Printer,
但系呢样嘢咁新对佢有啲又爱又怕,怕自己能力不足,
驾御唔倒呢个世间尤物,但系当我睇倒gorto师兄系一个post入面,
将佢嘅毒全部晒冷嘅时侯,小弟即时諗都唔洗諗回咗以下呢篇文!

   根据可靠诮息：势戒慧笙早积针对以上最新型毒已经提出警告，
    此毒毒性猛烈，毒性如下：

   1.闻者心酸 (闻到人地有3D Pinter,个心就酸痛麻痺)
    2.听者流泪 (听到人地有3D Pinter,就不自觉流出口水,鼻涕同眼泪)
    3.观者会產生严重幻觉 (睇到人地有3D Pinter,屋企突然间又睇到有一部)

   综合病徵如下

   a.价值观改变 (突然间觉得以前好有用嘅嘢变得好无用,要揼咗去,以便腾出空间)
    b.空间变大 (突然间觉得间房变大,本来无位摆3D Pinter嘅,都突然间摆到)
    c.时间变慢 (个脑突然间运行速度加快一倍,令到自已感觉一日有48小时)
    b.突然间想变成驯兽师,去驯服一隻强大无比嘅非洲野狗

   乡讲正苦亦对此提出呼吁,购买此类毒品必须经家庭财务大臣妈妈桑一郎同意,
    及法官妻妻惨厠纸大人批准,在DR.Tiger医生指导下方可服用,否测会有严重后遗症產生.

   吸食毒,遗害无穷,不可一不可再,要向毒说不!
各位师兄如果睇完小弟呢篇回文,好似朱咪咪话斋,
如果你有一项或两项以上嘅病徵出现,咁你已经中毒啦!
可以唔洗諗即刻买机解毒,点解我会咁讲?
因為要驾御一部3D Printer唔系讲你要有几高嘅学歴或者知识!
而系讲你对佢有几大嘅热情,就好似追女仔一样,
如果个美女系绝色佳人,你对佢一见钟情,
就算佢系火星人讲火星话,你都会将你个小宇宙发挥到极限,
好快你就会学识讲火星话,重有好多连自己都估唔倒嘅奇妙事情发生!
就好似我睇到人地有部3D Pinter,个床头突然间又睇到有一部咁奇妙!
再加上日头有同学会支援,夜晚有我呢隻僵尸系度,
真系唔洗惊喎!<骑!骑!我呢隻僵尸好nice嘅,唔会吸血架!>
我呢隻乜都唔识只系样样识少少嘅僵尸都搅得掂!
无理由师兄你正正常常会唔得架!你话系咪

2.新手预备篇

各位已经下定决心买机嘅巴打,可能心中都有个疑惑,
究竟买成品机定套件自己砌好呢?如果你系老江湖,
对呢样嘢已经素有研究,又有DIY能力,个荷包又乾乾地,
无乜多餘嘅閒钱,咁可以去买件平平地嘅套件去砌,
不过我都建议你买番同呢度自已砌套件嘅师兄嘅相同型号,
起码有乜事起上嚟都有人帮倒手,如果你买嘅套件型号,
同呢度啲师兄唔同,咁极有可能会发生爱莫能助呢种惨事,
到时半天吊唔知点收科!

如果师兄好似我咁,有些少DIY能力,但其他方面又唔系太识,
我建议师兄好似我咁,买成品机,咁样虽然比较贵,
<我买个部机食埋套餐要港币6000>,但系就少咗好多麻烦嘢,
个心会定好多,慳返唔少精神同时间,只要稍為睇下使用手册,
再tune下机,就可以专心去构思自己嘅设计模型,烦少好多嘢,
好快就投入咗3D Pinter嘅世界,享受自己设计成品,
睇住佢点样由无到有,好似睇住自已啲仔女出世一样,
你话几兴奋呢!

不过你除咗有部机之餘,亦需要一啲工具辅助,



如上图所示,呢堆系我嘅工具,有啲经常用有啲好少用,

经常用嘅包括有:
1.电子卡尺
   量度一啲需要比较準确尺吋嘅物体.
2.唔知叫乜嘅工具(本身原本用嚟拆胶壳嘅工具)<可用螺丝批代替>
   用嚟拆基板/支撑(Raft/Support).
3.扭耳钳
   用嚟夹走喷头(Extruder)或heatbed上嘅多餘胶丝.

好少用嘅包括有:
4.电子水平尺<可用普通水平尺代替>
   用嚟调校放置3D Printer嘅平台水平,通常便用一次就够.
5.各种小手挫
   系个成品印大咗小小或无法列印嘅形状<需要用手挫挫出形状>时使用.
6.金属毛刷
   用嚟擦走送丝齿轮上嘅胶粉.<送丝齿轮会因长期使用,积聚太多胶粉导致齿轮滑牙>
7.平扁形介刀
   用嚟铲走heatbed上嘅多餘胶丝<顽固型>或修饰成品边位.

有咗以上工具,系操作时你就会更加得心应手了!

另外要提醒一下买咗机嘅师兄系收机时可能遇到嘅问题,
以我嘅情况為例:
a.运输问题
   我嘅机系由顺丰托运,可以系网上追踪,睇倒部机已经嚟咗香港重话己出仓运送,
   点知转头又话地方偏远,要择日再出!諗住第二日应该送到嚟啦,点知第二日又系咁讲,
   真系由天堂跌咗落地狱,到咗下午近黄昏时份个手机突然嚮,话系顺丰送货,
   问有无人系屋企收货,好彩啱啱系屋企附近,嘭嘭声赶返去迎接呢件人间极品,
   所以有时都唔好尽信佢嘅网上资讯,諗到佢差唔多到就唔好行得离屋企太远!
b.插苏头规格不合用
   小弟因為买咗国產机,佢插苏头系扁形叁角,
   唔啱插香港插座,不个小第砌机多年有好多电脑电源线剩低,
   可以替换使用,如果无电脑电源线嘅师兄可以去新高登买返条,
   无记错应该十几蚊就有一条了.
c.喷头模组安装
   刚收到部机见到个喷头模组,可能包装关系无安装到,剩系用泡泡胶纸包住,
   又揾唔倒安装说明书,剩系见倒一包配件同一张SD卡,打去客服问比咗个网址我,
   个网页有安装说明,事后先知原来啲安装说明同软件系哂SD卡入面,真系大乌龙!

接落嚟就到硬件与软件篇同新手tune机篇,首先我要强调呢个系新手上路post,
所以只会对以下项目作出一啲简单嘅介绍同描述,并唔会作出深入嘅探讨同研究,
虽然呢个post系小弟开,其实都只不过系代替同学会嘅师兄写架咋!
因為同学会或买咗机嘅师兄,已经完全沈醉系3D Printer嘅世界,小弟都系强忍住,
衬重未开始划图设计自己心爱嘅作品之前,完成呢个post! 前人种树,后人乘凉!
因為小弟系新手,走过好多冤枉路,唔想各位未买机嘅师兄重滔小弟嘅覆彻,
呢个亦都系gorto师兄希望小弟做嘅嘢!但如果师兄有啲比较深入嘅问题想问,
小弟仍然欢迎,到时同学会嘅资深师兄会代小弟回答嘅!

3.硬件与软件篇

硬件篇:
先讲一下硬件部份3D Printer同普通Printer嘅分别,3D Printer系运作时,
有一个好热嘅外露喷头同heatbed,有小朋友嘅家庭呢点要注意同顾及安全!
从表面可见,有x，y，z三条轴,分别负责喷头同heatbed嘅左右，前后，上下移动,
有几个步进马达,分别负责控制及提供动力比x，y，z轴同送丝齿轮，两条同步带，
内藏负责供电比步进马达内置micro controller嘅Motherboard,
原则上帮佢加个SD模组,佢就可以脱离电脑独立运作,独自完成整个打印模型过程,
系呢点上面我系强烈建议系买机或砌机时帮佢加番个,因為实在太方便勒!.
咁佢点样独位运作呢?佢有一个简单嘅内置操作系统,有一个LED显示同几粒控制按钮,
只要看图识字,就可以完成好多基本操作,例如:

b.打印成品
b.调整平台水平<配合heatbed嘅螺丝调校>
c.入胶丝或退胶丝
d.蜂鸣器开关
e.一个辅助你开机设定嘅精灵程式
f.预热喷头同heatbed嘅温度

等等不能尽录........

喷头 & heatbed

LED & 按钮

SD模组 & 电子水平尺


软件篇:
软件部份有主程式ReplicatorG,负责產生gcode档案嘅副程式Skeinforge两部份,
ReplicatorG主要负责载入3d档案,透过usb介面控制3D Printer嘅一般操作,
包括系硬件讲嘅3D Printer内置操作系统大部份功能,佢亦会call Skeinforge副程式
透过Skeinforge產生gcode档案或可供3D Printer操作系统嘅x3g档案,以便离线打印,
透过Skeinforge亦可对3D Printer作出微调,<即tune机>,所產生嘅微调数据会写入gcode档案内,


以下会摸拟一次整个打印成品嘅过程:(以小弟為例)

1.用SketchUp 8划番个3D摸型,用SketchUp嘅 STL plugins输出STL档案.

2.打开3D Printer电源,按下上面最右边icon暂时断开与电脑连接,<如连接电脑将不能进行產生 GCode档案动作>
    打开ReplicatorG程式,按下File->open->载入档案.

3.按下右手边move按钮,再按上面center同put on platform按钮,将模型置中及紧贴平台.

4.按下Generate GCode按钮,call出GCode参数调校介面(一般调校一次或使用预设值已经可以).

5.调校完按下介面下面Generate GCode按钮產生 GCode档案.

6.按下上面右二icon与电脑连接,连接后再按下左上角File对下第一个icon按钮进行打印

7.或按下右三icon按钮将GCode档案转成3D Printer,内置操作系统嘅格式进行离线打印.

8.个人间极品系我面前跳左三十几分钟圆步舞之后,打印完成!


呢旧系乜家伙,唔话你听,师兄自己估下先,迟啲会為佢开番个post!

4.新手tune机篇

讲到tune机篇小弟就有啲嬲嬲地,事缘虽然系买机之前,
小弟為左做足tune机準备,爬返以前嘅post做一啲重点撮要,
但一直以嚟,小弟都搅唔清楚啲软件嘅关系,即系我上篇所讲嗰啲程式,
以為佢的系独立运作互不相干,而系旧post入面,有啲提供Skeinforge程式,
嘅下载连结,但系系我有机之后,想下载时个网址又瓜左下载唔倒!
我部机有跟机汉化版ReplicatorG程式,但揾唔倒Skeinforge程式,
咁唯有暂时放弃tune机嘅念头,用跟机汉化版ReplicatorG程式印住野先,
到我几经尝试搜寻终於都下载倒Skeinforge程式,但打开佢感觉有啲古怪,
无办法跟住我啲tune机撮要去做,以為系自己天生愚昧,一时间未能掌握要点,
加上我系僵尸一名,夜妈妈同学会啲师兄都训哂教,又唔想烦住佢的,
於是自己试下搅下,下载左啲测试模型,日日如是者,系咁搅,系咁印,搅左一个星期,
终於忍唔住衬放假向同学会发出救求,同tune机达人ma_hty师兄,讲左我个情形,
点知讲极都好似有啲鸡同鸭讲,倾唔埋欗,就系唔知点算之际,小弟系网上发现左啲野!
终於谜底揭开,即时雨过天睛,一天都光晒!原来我将啲注意力太过集中系Skeinforge程式,
忽略左ReplicatorG程式,就系我同ma_hty师兄倾紧嘅时侯,提到ReplicatorG程式,
於是一边倾一边上网搜寻,比我睇倒英文版嘅ReplicatorG程式同我嘅跟机汉化版有分别,

即刻明白其中关键要点,立即点击下载安装,再call出Skeinforge副程式,
跟返之前个tune机撮要,好快就将部机tune好勒!

系tune机嘅过程系有步骤之分嘅.<当然最先就系将放置部机嘅平台先校好水平.>

1.调校喷头同heatbed嘅水平同距离.
   首先放一张A4纸系平台同喷头之间,打开3D Pinter电源,利用右边方向按钮,
   将部机嘅自带操作系统调到Level Build Plate,(主页->Utilities->Level Build Plate),
   按下中间按钮进入,会出现简短英文教学,如下图

  继续按下中间按钮,headbed就会自动升起,喷头亦会移至正前位置,
一边调校heatbed底下前方左右螺丝头,一边将A4纸向不同方向拉动 ,

heatbed底下前后左右四粒调校螺丝头

直至感觉拉动A4纸时, 有被喷头压住而又未至不能拖动為止,
之后再按下中间按钮, 喷头会移至headbed不同位置, 留意LED显示,
继续用呢个方法配合调校headbed底下螺丝头, 完成调整整个调校过程.

喷头会移至headbed不同位置,调校正确的基底(Raft) 形状為略呈扁平状.




2.调校Skeinforge副程式参数
   <本来小弟想用多几日将呢个项目写好啲,但為免坐头位嘅kayming师兄等得太耐忍唔住,
      会系小弟屋企楼下伏击我, 所以粗粗地........,希望睇唔明嘅师兄出声,少弟会尽量回答,
      或欢迎同学会嘅师兄抢韁回答,以解小弟知识贫乏之困境!>

        <修改此项参数嘅目的,為将0.5mm-thin-wall_aa模型墙身厚度,调校成与喷头直径相同>
注意:0.5mm-thin-wall_aa模型,只作為tune机使用嘅工具模型,与其档案名0.5mm无关,莫因其名字而受误导!

在进行修改参数之前,先确定部机嘅喷头直径及下载测试模型.

http://www.thingiverse.com/thing:52946

下载后先打印0.5mm-thin-wall_aa模型,量度墙身厚度以便得出数据,作之后修改参数之用.

<注:在进行修改任何参数之前,请用纸纪录其预设数值,以供日后有需要时使用.>

打开ReplicatorG程式,点击Gcode按钮,再按Edit Slicing Profiles会出现选择介面,
点选自己部机嘅型号,我嘅系Replicator 2 slicing defaults,再按Edit call出Skeinforge副程式,
确认以下选项选择正确:
Profile Type:Extrusion
Profile Selection:ABS
Craft

1.Dimension
     Filament Diameter(mm)=1.82       <量度胶丝平均直径,1.82為预设值.>
截取一段大约一尺长胶丝,分别在胶丝的头中尾三处用卡尺量度,得出平均直径后再修改以上参数值.

2.Carve
    a.Edge Width over Height(ratio)=1.3333333       <喷头直径/层厚 nozzle diameter/layer height>
如果你打算用0.3mm层厚进行打印,则以上参数值的计算方法计算為:  (以我為例)
0.4(喷头直径)/0.3(层厚)=1.3333333,将此结果修改以上参数值.
    b.Layer Height(mm)=0.3
由於打算用0.3mm层厚进行打印,所以将0.3填入以上参数值.

3.Fill       <此项参数值对tune机结果无影响,只是顺便提及>
    Infill Solidity(ratio):0.1      <0.1=10%填充率,1=100%填充率>

4.Inset
   a.Infill Width over Thickness(ratio):1.3333333       <喷头直径/层厚 nozzle diameter/layer height>
此项只需填上2a的参数值即可.

5.Speed
  a.Feed Rate(mm/s):40<预设>
   b.Flow Rate Setting(float):29         
此项為本文开始时提及,将tune机前打印嘅0.5mm-thin-wall_aa模型墙壁厚度数值,
用以与Feed Rate(mm/s)数值相除,再乘以喷头直径,以我為例之前模型墙壁嘅厚度数值=0.55mm,
所以算式為40/0.55*0.4=29,所以将29填上以上参数值.设定好以上参数后,再印thin wall量度,
太簿(小於0.4mm)要加大数值,太厚(大於0.4mm)要减小数值,反覆地将Flow Rate Setting(float)以加减1為限,
作出调整,直至thin wall维持0.4mm而thin wall墙身无己乜疏洞,即墙身厚度刚刚超过0.4mm之前的数值,

每次完成调整以上参数值后,记得要按最下右方按钮储存设定.

如果可打印出0.4mm(我嘅喷头直径)嘅0.5mm-thin-wall_aa模型墙壁厚,

再继续打印之前下载嘅测试模型,裡面有test_plug同plug_test2,
如果可以将两个模型合埋一齐,即tune机成功!
<呢个测试模型档案及教学文章乃系tune机达人ma_hty师兄所写,
因為小弟英文差,加上之前做左ma_hty师兄,系以前啲post嘅tune机撮要,
所以尚未拜读,各位英文好嘅师兄可以详细阅读,肯定比我写嘅更清楚明白!>


图中有S字模型,上下系不对称只可配合字型结合,呢点要留意下.

呢度顺便post用0.17mm同0.3mm层厚(Layer Height)嘅分别,
為使各位知道放大程度,post一张伍毫子嘅伍字放大图.


0.17mm层厚

0.3mm层厚

0.17mm层厚

0.3mm层厚

0.17mm层厚

0.3mm层厚


如图所见0.17mm比0.3mm层厚,系比较细緻,线条亦比较幼细,
但针无两头利,层厚越细打印时间越长,為免浪费时间,
要视乎自己对模型细緻度嘅要求,而作出适当调整!

ps:由於DaCongo师兄对本篇文章,已经作出详细修正及说明,小弟不会修改,
      前车可鉴,各位师兄可以睇下小弟呢个新手所犯嘅错误,对比DaCongo师兄嘅修正,
      可以更加了解明白,一般如小弟嘅新手容易犯嘅错误!

5.简单硬件维修篇

轮到呢个维修篇,原来又系一单乌龙事件,事源有一日小弟打印test_plug模型,
因為个Gcode选项预设系印基底,諗住试下唔印,睇下佢乜野效果,点知就出事啦!
当等到喷头同heatbed温度够热,开始打印成品嘅时侯,突然听到卡卡声!
而个喷头又出唔倒胶,唔知发生乜野事,以為喷头塞左,於是用力将啲胶丝,
压落个喷头度,压得几下又搅掂左,但系觉得唔用基底个打印成品,会好痴个heatbed,
好难起底,之后就用返基底打印,一直相安无事,以為虚惊一场,但有一日,小弟想印一个,
自己划比较大嘅成品,但想佢表面平滑啲唔想因為用左基底,令到佢表面显得粗糙,
点知事件重演,咁我梗系重施故技,諗住好快搅掂,点知搅极都唔得,以為未食饭唔够力,
於是加倍施压,就系呢个时侯,惨剧就发生左啦!!
压得几野就听到啲怪声向下一望,见到heatbed上面嘅黄色kapton胶纸被喷头刮到烂哂,
将啲胶纸清除哂之后重大获,见到块铝板花哂呀!

买左部机唔够五日咁就比我同佢开斋,伤心之餘食左口事后烟,突然諗起之前做撮要时啲师兄有讲,
话个喷头印得多会有胶粉聚积,令到送丝齿轮滑牙出唔倒胶,咁唯有拆散个喷头清下啲胶粉勒.
首先如果你系新手第一步就要拍照存底,以免拆散左组装唔番,咁就大获啦!系拆每一样组件之前,
都要拍照一张,同埋最好加番盏灯同埋一隻碟仔装住啲零件,以免遗失勒!


拆解步骤如下 (以我為例)

1.攞出套餐配件内附三条六角螺丝批头


2.配合六角螺母大小选用六角螺丝批头,先拆左喷头底部两粒螺丝

3.将连接喷头嘅胶丝剪断

4.成个喷头拆左落嚟

5.将两条有白色胶管嘅长螺丝鬆开


6.鬆开风扇与散热片连接嘅两粒螺丝


7.将顶盖,风扇与散热片除下


8.再将覆盖住送丝齿轮面盖个两口螺丝鬆开,就会睇到送丝齿轮同侧边嘅滑轮


9.用金属丝刷或硬毛刷将胶粉清除

10.清理后再按之前步骤,逆向装返上去,在安装回送丝齿轮面盖嗰两口螺丝时,
    面盖要稍為向送丝齿轮方向移近再上螺丝,确保佢的之间嘅空隙唔会有虚位,
    令到送丝齿轮可以紧咬住胶丝,唔会產生另类滑牙事件!

我装返好哂之后再开机打印,諗住实掂过碌庶啦!点知情况依旧,当场坐左系度,
仲抓甩左一咋头髮呀,阴公!
由於小弟系修理喷头时帮佢加左盏LED灯,再试重复列印出唔到胶个阵时,
好清楚睇倒个喷头非常紧贴个heatbed,反复研究之下终於揾到原因,
原来系个程式有bug,一唔用基底(Raft)个heatbed就会升高左少少,
令到喷头非常紧贴个heatbed所以出唔倒胶,之前印细件模型个阵时,
之所以加压胶丝一阵会无事,系因為压一阵佢都已经印第二层,个heatbed降低左,
所以又出倒胶,而印大型模型时,我压到啲kapton胶纸烂哂,佢都未印第二层,
所以就赖哂野啦!, 不过有失亦有得,咁样又令到小弟学识左点样清胶粉,
过左无耐又真系因為胶粉太多而出唔倒胶,呢次小弟卓卓声话咁快就搅掂左啦!
但系原来因為胶粉太多而出唔倒胶,个送丝齿轮滑牙系唔会有卡卡声架,问你死未!

6.新手注意篇

跟住会讲下一啲小弟曾经遇到嘅问题同点样解决!

a.The Sketchup file import & export file
    Sketchup 系免费3D划图程式,最岩我呢啲无经验嘅人使用,操作容易又有Youtube教学,
    不过如果想列印成品就暂时未得,因為现时啲3D Pinter控制软件,重未support佢嘅档案格式,
     只支援STL及其他档案格式,所以如果要列印成品就要加STL Plugins比佢,但STL Plugins有个限制,
     就系要你嘅Sketchup档案名及所在目录,一定要用英文名字,而所转成嘅STL档案名亦都一样,
     是但一样出错都会令程式失效,出唔倒档案,就算出倒都印唔倒,而且就算用佢嘅import功能,
     将STL档案载入Sketchup程式时,所需条件亦同上述一样,呢点要注意.
b.ReplicatorG 问题
     ReplicatorG 程式如上文所述可以叫出 skeinforge程式后转成 gcode档案,就DaCongo师兄嘅建议,
     先用duplicate功能, 自己改个新名, 然后改新建的profile,我建议duplicate多几个,
     例如用ABS胶,用0.17层厚+快速或慢速分别新建一个profile,0.3层厚又同样咁整,如此类推.......
     总之只要个profile名改得比较清楚,咁系不同需要下列印成品,只要选择适当嘅profile就会方便好多.
c.ReplicatorG 可以多开
    ReplicatorG 系可以多开,如果部电脑系多核心,咁就可以同时将几个模型转成gcode档案,
    慳返好多时间,不过要记住一点,系多开时只有一个ReplicatorG程式连接到3D Pinter及操作打印,
    其他嘅ReplicatorG程式想连接就会显示连接失败,如果你有显示连接失败讯息出现,
    就要先检查有无唔觉意多开左,如果有就先关闭多开左嘅ReplicatorG程式,就会回复正常.
d.利用Gcode档案连续打印
    系列印成品时,只需在ReplicatorG载入预先转成嘅Gcode档案,已经可以直接打印,
    由於初次打印成品时,需要等待喷头及heatbed升温,打印完成又要等佢冻返先可取出成品,
    一来一回都嘥左唔少时间,如果要连续打印多个成品,更加浪费电力,所以系连续打印多个成品时,
    我建议预先将模型转成Gcode档案再配合系heatbed上面加多一块玻璃片,
    可以系打印成品完成时,把成品和玻璃片先移走等待冷却,系喷头及heatbed仍然保持温度时,
    再继续列印下一个成品,咁样就可以慳电,慳钱,慳时间勒!
e.胶丝click住胶轆，卡卡声
    新开封嘅胶丝系非常饱满,胶丝好容易跌出胶轆之外,做成click丝发出卡卡声,或胶丝缠得太紧,
    亦会產生同样情况,所以最好系使用之前,用空胶轆重新整齐地,鬆鬆地咁再'乔'过一次,
    而管住胶丝嘅铁氟龙管,尽量保持在胶轆嘅中间及适当距离,就可以大幅改善无咁易click丝,
    呢个系印大型成品又要因事外出时,非常重要!因為系列印途中发生click丝现象,当你返到屋企,
    你只会见到个3D Pinter变左一部绵花糖机,成部机都充满由胶丝做成嘅绵花糖物体,
    重有一件失败嘅成品,净系清理返部机都有排搅!点解我知,因為小弟已经瀨左野啦!
f.撞到喷头失步，卡卡声
   系部机列印时千祈唔好撞到部机,或系部机附近摆放杂物,因為有时部机会因模型嘅形状,
   大跳霹靂舞,到时震过猫王,啲杂物会震到跌左落嚟,阻碍喷头或heatbed上下,前进或后退,
   做成失步会发出卡卡声,由於部机唔识自动调节返,咁样个成品註定失败,可以熄机重来!
g.列印暂停
    呢个功能非常失败,千祈唔好用,佢会令到成品系暂停嘅地方,產生脆弱点,稍加用力即时断开.
h.列印失败
    列印失败有好多原因,除左部机setting问题,原来都关划图事,小弟就试过因為划得唔好,
    有啲地方佢无印到,但睇返3D模型明明有划,事后检讨应该系小弟划图时返执太多所做成,
    系划图之前,尽量事先构思好划图步骤,冒求简单明确,咁失败率就会低好多.
i.打印填充率
   小弟试过用10%同20%打印同一模型,用20%时发觉个列印时间,会随著模型大小相差好远,
   重震得比较利害,同非常嘈吵,如无必要真系唔好用,除非个模型比较细先至好考虑使用.
j.加LED灯
   我部机本身设计系无照明设备,有起事上嚟会睇唔清楚,好似我系维修篇所讲,因為加左LED灯,
   先清楚睇倒个喷头非常紧贴个heatbed,才会揾倒原因,所以最好加返盏LED灯比佢,以作照明.
k.列印时发现表面有粒粒问题
    有阵时印印下会发觉有啲好细嘅粒粒系表面凸起左,呢啲可能系胶丝有杂质或受潮產生气泡,
    如果唔系大凸出可以不理,但如果凸得利害,小弟会衬个喷头走开时用火枪型打火机烧下佢,
    再用扭耳钳尾部扁平部份将佢压平,一般情况下效果都唔错,可以考虑使用.
l.解决印大型模型时,四边角晓起问题(正在实验中)
m.解决印大型模型时,好难起底问题(正在实验中)

待续...................................................................

ps:由於 l 同 m 项正在实验中,咁岩啲胶丝用完,小弟依家真系无胶用,
     所以要等实验完成,再随后补上,又由於小弟由出机到依家,同呢件人间极品夜夜痴缠,
      搅到无教好训,啲精......力同荷包都被佢吸乾,所以要休多几日息,先至再同佢欲仙欲死过勒!

师兄你谦啫！个Lego用嘅盾牌都己经系五年前嘅事，
我学划图只有两三个礼拜咋！重要有gorto师兄嘅私人影片教学，
先至划到小小野，小弟非常期待睇睹师兄作品架！

虽然3d printer可以打印成品，但成品又需要创造力同划图技巧，
软硬件都同样重要，我諗好多想买机嘅师兄，都因為呢样野而却步，
虽然话youtube有教学，但始终系外国影片居多，有时都听唔明佢讲乜架！
师兄真系有心有力，造福大众！

小弟亦是闪X用家，一直有心无力，见到师兄之大作，终於按奈不住出来分享下。

平台校準
我初初都是用机内的校準功能校準，但是较极都不是很理想，较得一边好，另一边又变左，真系较到儍，后来用了以下方法，我自己就觉得比较易D校準。
先把热床较低小小，近住把热床加热，再把白纸放上，再运行校準功能，当喷头移到第一个校準位置时(应该是前方正中)把机关上，之后用手把嘖头移到其中一粒较平台的螺丝附近进行校準，再以顺时针或逆时针方向校準其它螺丝。校淮方法与平时一样，都是移动下张纸，不过每次只较一粒螺丝。

今次写住咁多先!
难得师兄肯将知识分享!师兄嘅方法小弟有时间会试下,
為左投桃报李,小弟特别為师兄预告改heatbed调教方法,
不过可能要牺牲小小kapton胶纸嘅原整性.

方法為:
1.先到下面条link下载工具,用100%填充率打印4粒齿轮,支架部份不用理会
http://www.thingiverse.com/thing:9094
2.鬆开后面电源接线及4口调节螺丝,将原本系下底嘅大螺丝头,调到上面及锁紧heatbed
3.再装上弹弓,先对準后面两粒,再对準前面两粒,咁啲弹弓就比较容易装上唔会走位
4.将刚拆出嚟嘅细六角螺丝母对準齿轮六角凹位,用钳压入
5.轻压heatbed与木版,令螺丝尾端伸出更多空位
6.套上二片金属介子,再用齿轮中间六角螺丝母对準锁上,
7.先锁上后边两粒,再锁上前边两粒
8.接回后面电源接线,大功告成!

如此给力。。。

嗯 给力 就是读起来费劲

牛。广东话不是一般人可以看明白的